Słónčne wokomiki w syći

Po syći dundajo zhoniš wo tajkich a hinašich problemach, móžeš so wo aktualnych podawkach w swěće informować, radu w najwšelakorišich prašenjach namakać, abo so prosće zabawjeć. Poskitk interneta je hoberski a dušu jenož zdźěla wokřewja. Bjezdwěla słónčne wokomiki namaka syćowar na stronach http://beno.budar.de, w prezentaciji woblubowaneho serbskeho spisowaćela a basnika.

Žołto-oranžowy pozadk wita kóždeho, kotryž sej na stronki dóńdźe. W stilizowanej silueće knižki strowja słowa Ćah časa nima žanoh kónca / a jědźe za tebje kaž čert. / Twoje dny su wokomiki słónca / za wóčko, wutrobu a ert. – wuwzate z basnje "Wokomiki słónca".

Pod rubriku "moje žiwjenje" so Beno Budar skrótka sam předstaji.

Dohlad do jeho tworiwosće dóstawa čitar pod rubriku "moje basnje". Dźewjeć z nich je tuchwilu jako tekst přistupnych. Přidatnje je awtor sam tři z nich čitał, tak zo móže sej wopytowar stronkow z pomocu mp-trójkow tež awditiwny zaćišć wo basniskej wobrotliwosći Bena Budarja stworić. Žortna žiłka spisowaćela jewi so tu wosebje w basni "Moje rjane syčawki".

Pod rubriku "moje knihi" so dokumentuje, zo njeje spisowaćel swoje talenty pod kórc stajił, ale je nawopak z wužitkom zasadźował. Wobšěrny spis jeho wozjewjenjow pokazuje wobšěrnosć a mnohostronskosć jeho tworiwosće. Nimo poetiskich zběrkow namakaja so mjez jeho wudźěłkami dramatiske twórby a proza – kaž na př. njedawny bestseller "Tež ja mějach zbožo" (1. a 2. nakład LND 2005). Tež jako tekstar mnohich spěwow je Budar znaty a připóznaty. Nimo toho je sej jako přełožer a zestajer/wudawaćel mjeno sčinił.

Rjenje by było, by-li so kruh jeho čitarjow z pomocu tež grafisce poradźeneje syćoweje prezentacije rozšěrił a tych docpěł, kotřiž dotal njemějachu składnosć jeho twórby zeznać.

Strony su přistupne w hornjoserbšćinje a němčinje pod adresu http://beno.budar.de.