10.04.2006
Manfred Hermaš, Rowno
Rozmyslowanje
Sedźach 16. měrca wječor w sydarni Hamorskeje milinarnje a poskach na słowa narěčow a wuprajenjow čłona dohladowarskeje rady Vattenfalla, knjeza Hasa, předstejićerja za brunicu dr. Zeißa a decernenta delnjošlesko-hornjołužiskeho wokrjesa Genaua. Prěni raz so tak ryzy přichod Slepjanskich kónčin rysowaše, tež hdyž to na tutym dnju jenož pódlacu rólu hraješe.
We słowach a widejoprezentacijach so pokazowaše, što so wšitko z wjace hač jednej miliardu eurow inwesticijow w běhu dźesać lět w Bělkowskich kónčinach stanje.
Za to pak trjeba koncern politisku wěstosć, dokelž chce ze srědkow dlěje hač 40 lět swój wužitk měć. Wšitcy, kotriž móža jako mulitplikatorojo skutkować, su prošeni byli, politisku platformu za předrozsudy přihotować.
A kak móžeš ludźi dobyć? To njeje ničo nowe, to tola kóždy z tajkich „kofejowych jězbow“ dawno wě! Argumenty su trěbne – što z tym za mnje wuskoči, a to přeswědči potom nimale kóždeho. Ale na politiskim polu je lěpje, za to wužiwać wuraz: To je dobytk za zjawnosć abo za druhich. Nowe dźěłowe městna za 100 ludźi, zaručenje městnow za 1000 ludźi, potom dźěło za předewzaćelow we Łužicy w fazy inwensticije. 20 procentow srědkow, tak Vattenfall slubi, přepoda so domoródnym.
A to naličenje dźěše dale, druzy maja swój wužitk z přenocowanja, dalši z tym a tamnym ...
Słyšach dale wulke słowa wo zbožu za nahraničnu kónčinu, potom pak njemějach nadobo hižo wobrazy widejoprezentacije před wočomaj. Ně, widźach druhi wobraz: Kak pinčnik ze samochwału dobru pojědź na blido hosćenca „Łužica“ staji. Ale krótko po tym do njeje muška zaleći.
Tuta pak pinčnika myli, kotryž je sej tak wulku prócu dawał, zo wšitko tak porjadnje kóždemu słodźi. Ale derje wukubłany pinčnik nima so jenož wo słódnosć starać, tež to rjanočuće je za njeho pohon. Tak wza serwěrowansku łžicu, sunje muchu na łžicu, chce ju preč wzać – ale w tutym wokomiku za blidom sedźacy na njeho hladaja. Pinčnik so stróži, mucha padnje ze łžicy na kromu talerja. Što čini pinčnik, što za blidom sedźacy? Žana wotmołwa.
Sym zaso při prezentaciji – ale ta mucha mi w mozach wostanje.
Smy my Slepjanscy ta mucha? Myslu sej, zo haj. Tak kaž wona mucha so woni nětko čuja. Ma mucha hišće dosć žiwjenskeje mocy, zo móže wotlećeć do rjaneho swěta, abo přihladuje cyła letargiska, što pinčnik dale čini abo wočaknje, hač poskićena jědź, kiž nětko pak wjace cyle čista njeje, so wotpokaza?
Za to hišće žane wobrazy a wotmołwy nimam.
W pomjatku pak mi wosta, što je so wšitkim druhim za blidom dariło!
Hamorske a Klětnjanske dóstanu přidatnje wot kraja inwesticije za to „hucho“ a za wulki projekt eurojězor. A tež Braniborska je spokojom, dokelž z tych milionow tonow wuhla we Wochožanskej a pozdźišo Rychwałdskej jamje je trjeba 20 milionow za dalšu produkciju w Janšojskej milinarni. Njeje so raz prajiło, zo zaruči so z Rogowom 4.000 dźěłowych městow?
Wšitcy něšto z nowych inwesticijow za přichod maja, abo?
Serbja maja jenož slubjenje za přichodnu rozmołwu z koncernom ...
Dalšej nastawkaj z tutej problematiku: