19.04.2006
Manfred Hermaš, regionalny rěčnik Domowiny, Rowno
Slepo a wokolinu wotbagrować?
Kaž na měsačku - krajina po wotbagrowanju.
W Slepjanskim regionje resp. we wosadźe běži tuchwilu naprašowanje, kak wobydlerjo sami přichodne dobywanje wuhla a bližacu so jamu widźa. K tomu su nimo 18 jara konkretnych prašenjow tež kartu do rukow dóstali, w kotrej časowej dobje so jama bliži (hlej karta z dwurěčnym pomjenjowanjom wjeskow).
W kóždej domjacnosći so tež za zwiskom k serbšćinje, hajenju nałožkow a tak dale naprašuja. Z wurězka prašenjow je brizanca wučitajomna. Wosebje z prašenja 13, hač móža sej ludźo přesydlenje předstajić, a z 18. prašenja, kak widźa wuskutki na zdźerženje Serbstwa we wosadźe.
Wurězk z naprašnika, kotryž tuchwilu w Slepjanskich kónčinach kursěruje. Wjace? Tu kliknyć!
Do naprašowanja běchu so wobydlerske zhromadźizny organizowali. Nic jenož, zo so informacije dawachu, ale dźe tež wo to, zo ludźo scyła wotmołwja. Tuchwilu hišće njeje znate, kelko wotmołwow je so wróćiło. Přewjele drje njepředleža, hewak njebychu wjesnjanosća hišće raz wosobinski list wobydlerjam pisali. Fakt je: Štóž dźensa mjelči, woteda swoje prawo do rukow druhich – wón zadźěwa tomu, zo so přichodne generacije tež k tomu wupraja.
Kak koncern Vattenfall to widźi, je wot 16.03.06 znate. W nowinach je wjele stało. Tež zašłe wudaće nowiny koncerna TERRA WATT to z kartami a přinoškami tematizuje.
Bórze jenož hišće brunicowa jama?
Hdyž rezultaty naprašowanja předleža, je móžno so k tomu wuprajić. Tuchwilu so rěči a diskutuje zboka zamołwitych a Domowina so njewuzamknje.
Dalšej nastawkaj z tutej problematiku: