Serbja w syći

We wobłuku swojeho diplomoweho dźěła slědźi rodźena Njebjelčanka Felicitas Šefrichec tuchwilu wo temje "Serbja w syći". Zo by něšto wo zwučenosćach Serbow při wužiwanju syće zhoniła, je naprašnik online stajiła.

Cyłkownje 27 prašenjow měri so na wšelake tematiske wobłuki interneta. Po krótkich zakładnych informacijach sćěhuja prašenja kaž "Hdźe wužiwaš internet najhusćišo?" abo "Kak dołho přebywaš přerěznje w interneće?".

Tež wužiwanje webserwisow kaž tež dopisowanje do forumow je předmjet naprašowanja.

Poměrnje wobšěrnje wěnuje so studentka prašenju, kotre serbske internetowe poskitki so do kajkeje měry recipuja.

Naprašnik budźe hišće hač do 17. meje w syći. W zajimje swojeho dźěła prosy Felicitas Šefrichec wo to, zo by sej prawje wjele Serbow wšitkich starobnych skupin čas wzało a naprašnik wupjelniło.

Serbskorěčne naprašowanje studentki namakaće tu.