Serbska rěč w hospodarstwje

Srjedu, 28. smažnika 2006 wotměje so na žurli Budyskeho Serbskeho domu konferenca pod hesłom "Serbska rěč w hospodarstwje". Zaměr połdnjowskeho zarjadowanja je, wobswětlić nałožowanje a wužiwanje serbšćiny w hospodarstwje – nic jenož we Łužicy.

W přeprošenju piše zarjadowar, Domowina – Zwjazk Łužiskich Serbow, zo wuwědomi so wobdźělnikam mj. dr., zo:

- njeje wukubłanje w serbskej rěči z wotchadom ze šule zakónčene

- je trjeba, serbsku rěč w tutej žiwjenskej sferje dale wuchować

- ma so potrjeba jeje wužiwanja zbudźić

- nałožowanje serbskeje rěče w hospodarstwje přinošuje k zwyšenju prestiža serbskeje rěče a sebjewědomja jeje nošerjow.

Zahajenje konferency budźe 15:00 hodź. Po tym porěči Hanka Budarjowa z Marketingoweje towaršnosće Hornja Łužica / Delnja Šleska wo stawje hospodarstwa w sydleńskim rumje Serbow. Dr. Sonja Wölkowa, wotrjadnica rěčespytneho wotrjada Budyskeho Serbskeho instituta, přizamknje so z přednoškom na temu "Degeneracija serbskeje rěče?" Znaty mjeńšinowy slědźer dr. Ludwig Ela, tohorunja přistajeny Serbskeho instituta, porěči wo móžnosćach a hranicach mjeńšinowych rěčow w hospodarstwje. Wot něhdźe 17:00 hodź. budźe składnosć za diskusiju wo mjenowanych referatach. Po přestawce zahaji Hilža Nukowa z přednoškom "Nowa Serbska rěčna šula za Hornju Łužicu?" druhi dźěl konferency. Sćěhujetaj serbskaj rjemjeslnikaj Hermann Jan z Dešna a Tomaš Rječka z Kamjenjeje z přinoškom pod hesłom "Čehodla angažuje so serbski předewzaćel w słowjanskim wukraju?". Nimo toho přednošujetaj tež Mikławš Krawc ("Předmjet serbšćina w powołanskim wukubłanju") a Mónika Cyžowa ("Nazhonjenja serbskich firmow z rěčnymi kmanosćemi wučomnikow dźensa").

Přeprošenje na konferencu, kotraž měła dać nastork, so tež w zjawnosći sylnišo z tutej problematiku rozestajeć, měri so na serbsku zjawnosć, serbske firmy, serbskich wučerjow, zastupjerjow zarjadow a gmejnow, na dźěłarnistwa, zwjazki dźěłodawarjow, agenturu za dźěło kaž tež na pólske a čěske konsulaty.

Přizjewjenja su móžne pod e-mailowej adresu domowina-bautzen@sorben.com