90. narodniny Jurja Brězana

Po wšej Ukrainje znaty literarny žurnal "Kurěr Krywbasu", w kotrymž je so w smažniku tež knižka Jurja Brězana woćišćała.

W junijowym čisle jednoho z najpopularnišich ukrainskich literarnych žurnalow "Kurěr Krywbasu", kotryž wuchadźa w měsće Krywyj Rih, wozjewi so "Щоденник маленької такси" (Dźenik małeho dakla – Hunds Tagebuch) Jurja Brězana w přełožku Boženy Antonjak.

Přełožkej přidruži so krótke předsłowo z pjera Anatolija Iwčenka. Wone započnje so ze słowami: "Srjedź měrca dóstachmy z Łužicy zrudnu powěsć: Jurij Brězan je njeboh. W nocy 12. měrca 2006 wusny w swojej chěžce w małej wjesce z poetiskim mjenom Horni Hajnk najwuznamniši spisowaćel łužiskoserbskeho naroda Jurij Brězan. Swoje sydlišćo mjenowaše Archu Noacha, z kotrejež bě jemu přisudźene tež wotpłuwać do wěčnosće …"

Přełožk woćišća so w rubrice UNIWERS, w kotrejž publikuja so přełožki sławnych načasnych spisowaćelow.