Sorabija hyšći (pi)jo

Rapak - symbol serbskich študańcow w Lipsku.

Wałtoru, 13. 6., su se cłonki Lipsčańskeje Sorabije zasej raz na głownu zgromaźinu zmakali. W pśestawce mjazy dwěma graśoma swětowych mejstarstwow, su pśepowědali wšakorake temy.

Tak jo na pśikład wulět do Dolnjeje Łužyce planowany był, kenž jo se pak pśesunuł na kóńc awgusta. Weto buźo na planowanem terminje, 25. 6., mały wulět ku Cospudeńskemu jazoroju w Lipsku. Gaž wjedro wěrne wóstanjo, buźo to zawěsće rědne dožywjenje. Sorabijarje se zmakaju njeźelu, 25. 6., wótpołdnja napol styrich pśed serbskim internatom w Bornaiskej 198b na kafej. Wót tam droguju až k jazoroju, aby se tam kupali a w słyńcu pjakli až su brune. Gósći su witane!

Ale to njejo wšykno było. Nowe pśedsedarstwo jo se wuzwóliło. Z Janom Rjedu, Tomašom Klimanom a Maikom Herdenom ma pśedsedstwo zasej nogu, to groni tśi nogi, w źurjach internata. Naźeja jo wjelika, až mógu te tśi statkowanje Sorabije tam dalej wjasć a rozšyrjaś.

Na kóńcu zgromaźiny jo se naraźiło pšawniski status Sorabije změniś na ten zapisanego towaristwa. To by groniło mjeńše financielne riziko za cłonkow w paźe njegluki a w drugich pšawniskich pšašanjach. To musy se pak hyšći dokradnjej analizěrowaś a diskutěrowaś.

Chtož jo južo raz pla Sorabije w Lipsku był, ga toś te utensilije derje znajo ...

Na kšomje zarědowanja jo był wjeliki roj Šeršenjow wiźeś, kenž jo se pak zazdaśim na někake wětše zarědowanje na kóńcu lěta pśigótował. Snaź jo k tomu južo někótare wobźělniki z krejsa Sorabije zdobył.

Pó zgromaźinje su Sorabijarje bóžko musali bźezmócnje pśiglědowaś, kak jo Chorwatska na Brazilisku zejgrała. Pón jo jano hyšći pomagało swóju tužnosć w žydkosći zatopiś. Groni se, až jo se někótarym napšawdu raźiło to tšašne tšojenje ze spominanja wušmarnuś.

Internetowe boki Sorabije namakaju se pód adresu http://www.sorabija.de