Kultura, nabožina, region

Wurězk z wobalki noweje knihi. Tu kliknyć a powjetšić!

Zjednoćenje Europy steji hłownje pod hospodarskimi aspektami. Zo njeje to přeco tak, dopokazachu wědomostnicy a studenća, jako so na projekt „Kultura, nabožina, region“ zwažichu.

Pod hłownym nawodom sociologowki dr. Kerstin Bast-Haider ze Zhorjelca přewodźeše so wědomostny projekt, spěchowany wot Zwjazkoweje centrale za politiske kubłanje. Centralny nadawk rěkaše, kak hodźi so europska identita namakać, bjez toho, zo so specifika narodneje identity zhubi. Němscy a serbscy wědomostnicy dóstachu při tym fachowu podpěru z Ekumeniskeje akademije Praha a Šleskeho instituta Opole. Hromadźe ze studentami přemyslowachu kulturni wědomostnicy, sociologojo, teologojo, pedagogojo wo wuznamje kultury a nabožiny a wo identiće regiona.

Cyłkowny projekt traješe tři lěta. Kóžde lěto přewjedźeše so w druhim kraju lětna konferenca, hdźež rozprawjachu slědźerjo wo dotalnych wunoškach. Nimo toho běchu wob lěto dalše workshopy, ekskursije a seminary. Wuslědki přepytowanjow móžemy nětko w publikaciji slědować, w kotrejž su najwažniše rezultaty a diskusije zjimane. Kniha wěnuje kóždemu temowemu wotrězkej wosebity kapitl. Powšitkowne přemyslowanja jednotliweho tematiskeho ćežišća jewja so na spočatku kapitla. Teoretiske wuchadźišćo předewzaća bě, zo su centralne temy – identita a kultura – diferencowane a jara kompleksne fenomeny. To wšak pokazaja přinoški jednotliwych krajow. Wšelake dalše wotrězki wudospołnjeja dotalne přemyslowanja. Su to nazhonjenja z identitu w praksy, kotrež sebi wobdźělnicy we workshopach nadźěłachu.

270 stronska kniha pohnuwa do čitanja. Jeje wosebita hódnota leži w tym, zo je so tu poradźiło perspektiwy a stejišća z třoch namjeznych krajow zjeć. Nimo toho pozitiwnje napadnje, zo je tu tež sylnje wid Serbow zapřijaty. Dr. Měrćin Wałda ze Serbskeho instituta w Budyšinje je hłownje na wobsahowej koncepciji projekta sobudźěłał a je sam z dwěmaj nastawkomaj w knize zastupjeny. Kniha předleži najprjedy w němskej rěči. Snano so teksty tež w pólskej a čěskej rěči publikuja.

Kultur, Religion, Region. Junge Tschechen, Deutsche und Polen im vereinten Europa, hrsg. v. Frank Ahlmann:, Metropol Verlag, Berlin 2005