Naprašnik "Serbja w syći" wuhódnoćeny

Studentka medijoweje informatiki Felicitas Šefrichec přewjedźe njedawno online-naprašowanje "Serbja w syći". Mjeztym je něhdźe 150 wupjelnjenych naprašnikow wuhódnoćiła a wuslědki tež spěšnje wozjewiła.

Na cyłkownje šěsć płoninach dokumentuje rodźena Njebjelčanka z pomocu grafikow a přisłušnych komentarow dotalne zwučenosće Serbow při wužiwanju interneta. Ze zapodatych datow stwori mj. dr. ranking dotal eksistowacych serbskich online-medijow. Lisćinu nawjeduje online-magacin runjewonline.info před forumom internecy.de a online-poskitkom Serbskich Nowin. Na štwórtym městnje steji syćowy poskitk Serbskeho rozhłósa.

Prezentowane dźěło njespokoja so jeničce z dokumentaciju dotalnych zwučenosćow, ale praša so tež za potrěbnosćemi a přećemi. Wone dawa tak tež zarjadowarjam jednotliwych stron wažne pokiwy za polěpšenje serbskeho poskitka w syći.

Wuslědki namakaće tu!