Frizojo w Serbach

Logo friziskeje organizacije Friisk Foriining.

Jutře wječor zahaji so w Budyšinje tydźenska kubłanska jězba organizacije Frizow ze Schleswig-Holsteina Friisk Foriining. Delegaciju z 22 wosobami nawjeduje Jörgen Jensen Hahn, předsyda Friisk Foriining a čłon Rady Frizow (sekcija sewjer). Jej přisłušetej mjez druhim Lars Harms, čłon předsydstwa Friisk Foriining a čłon krajneho sejma Schleswig-Holsteina za SSW kaž tež Thede Boysen, sekretar mjeńšinoweho sekretariata při Zwjazkowym ministerstwje nutřkowneho.

Sobotu wobhladaja sej hosćo Budyšin a Serbski muzej a wopytaja wječor koncert chóra „Meja“ w Radworju. Ekskursija powjedźe jich njedźelu mjez druhim do Swinjarnje a Pančic-Kukowa. Ze serbskimi institucijemi zeznajomja so hosćo póndźelu, dnja 17. julija. W 9 hodź. powita jich předsyda Domowiny Jan Nuk w Serbskim domje (stwa 106), zo by jim narodnu organizaciju předstajił.

Přizamknu so wjacore rozmołwy, tak w 9.45 hodź. z direktorom Załožby za serbski lud Markom Suchym, w 10.30 hodź. z nawodu Filmoweho studija SORABIA dr. Toni Brukom,

w 11 hodź. z Bognu Korjeńkowej, wjednicu regionalneho studija a serbskeje redakcije mdr.

Potom slěduje wopyt Ludoweho nakładnistwa Domowina z redakciju Serbskich Nowin a Smolerjec kniharnju, hdźež informuje delegaciju mj. dr. jednaćelka Marka Maćijowa.

Dwurěčne znamjo do wsy - němsce a sewjerofrizisce.

Popołdnju su rozmołwy w Budyskej radnicy, w Serbskim instituće z direktorom prof. dr. Dietrichom Šołtu kaž tež wopyt předstajenja „Zhubjene a namakane“ w NSLDź a rozmołwa z intendantom Lutzom Hillmannom a jeho zastupjerku Janinu Brankačkowej planowane.

Wutoru informuja so hosćo w 9 hodź. Budyskim Rěčnym centrumje WITAJ wo dźěle tutoho zarjadnišća a wo serbskich šulach w 11 hodź. w Budyskim regionalnym šulskim zarjedźe. Srjedu poda so friziska delegacija na ekskusiju po srjedźnej a Delnjej Łužicy; mjez druhim wobhladaja so hrodźišćo Raduš, zeznajomjeja so z temu brunica a wopytaja Serbski dom w Choćebuzu.

Friisk Foriining prawidłownje tajke jězby organizuje, na kotrychž so jich čłonojo bliže z rěču a kulturu druchich narodnych mjeńšin w Němskej zeznajomjeja.

Wopyt we Łužicy je organizował referent Domowiny za kulturne naležnosće a wukraj Jurij Łušćanski (tel. 03591-550 208).