Rozrisanje, kotrež najšěrša zjawnosć njese

Naše šule - šule za žiwjenje!

SN wozjewichu 6. septembra 2006 na prěnjej stronje pod nadpismom „Koncepcija za serbske šulstwo: Tola předleži“ mjez druhim, zo je iniciatiwna skupina sakskemu knježerstwu zapodała koncepciju za serbske šulstwo. Tomu tak njeje.

Wobkrućam na tutym městnje swoje wuprajenja na forumje pjatk, dnja 01.09.2006 w Chrósćicach: Dnja 9. junija bě G. Milbradt jako zapósłanc (a wuraznje nic w swojej funkciji jako ministerski prezident!) po puću w swojim wólbnym wokrjesu a je so mjez druhim ze zastupjerjemi iniciatiwneje skupiny zetkał k informaciskej rozmołwje. Hačrunjež koncepcija “Naše šule – šule za žiwjenje” hišće dodźěłana njebě a to do dźensnišeho njeje, wuprosy sebi G. Milbradt wšelake přidźěła k wěstym prašenjam, kotrež běchu so w diskusiji jewili. Dale chcyše wućišć powerpoint-prezentacije měć, kotraž bě zakład tehdyšeje rozmołwy a kiž bazuje na prezentaciji Serbow na FUEN-kongresu w Budyšinje.

Potajkim njeje to, štož smy G. Milbradtej dali, ničo njeznate a tajne. Kaž wobkrući Harald Noeske z běrowa ministerskeho prezidenta, njeje naspomnjene pismo koncepcija, ale rysuje pod dźěłowym titulom „Unsere Schulen – naše šule Konzeption für das sorbische Schulwesen im Siedlungsgebiet der Sorben – Zuarbeit der Initiativgruppe zum Gespräch ...“ zaměry a staw dotalnych přemyslowanjow nastupajo nastawacu koncepciju. Wšitke naše dokumenty w zwisku z nastawacej koncepciju woznamjenimy z tutym titulom. Z dźensnišeho wida móžu rozumić, zo je tute pomjenowanje cyle same za sebje zamylace. Štóž pak wjace hač jenož titulnu stronu čita, zhoni w zawodźe h. mj. přidźěła cyle jasnje: „... legt die vorliegende Zuarbeit die Zielsetzungen und den Stand der bisherigen Überlegungen dar“.

Dotal smy 94 forumow, diskusijow a rozmołwow organizowali resp. so na nich wobdźělili a wo zaměrach koncepcije informowali. Na tute wašnje smy zjawnosć do zhromadneho přemyslowanja wabili. Tole dopokazuje, zo nochce nichtó z iniciatiwneje skupiny brizantnu temu kubłanja „zaćichim a z tajnej diplomatiju zboka wšeje serbskeje zjawnosće rjadować“.

Naše šule - šule za žiwjenje!

Spočatnje smy měnili, zo móžemy w běhu něšto měsacow koncept spisać a zjawnosći předpołožić, po tym zo smy so na wšelakich šulach, kotřiž po nowych konceptach dźěłaja, pola druhich narodnych mjeńšin kaž tež dalšich kubłanskich fachowcow nadrobnje informowali a tež wotpowědnu literaturu studowali. Ale hižo prěnje diskusije su nas k tomu pohnuli, wostać najprjedy w intensiwnej wuměnje z potrjechenymi, potajkim z gmejnami, staršimi, wučerjemi, a tež z politikarjemi. Přetož w tutych płódnych a wěcownych diskusijach je so rjad kompleksnych prašenjow jewił, na kotrež njehodźi so zlochka wotmołwić. Smy pak dale wo tym přeswědčeni, zo hodźa so wotmołwy namakać we wzajomnej diskusiji, kotraž je wusměrjena na konkretne wobstejnosće a zajimy wšelakich regionow serbskeho sydlenskeho ruma Hornjeje Łužicy.

Naš zaměr je a wostanje, zo namaka so rozrisanje za naše šule, kotrež najšěrša zjawnosć njese.