16.10.2006
Fabian Kaulfürst, Budyšin
Šwicarski šuler piše wo Serbach
© wikimedia.commons
Pohlad na Chur, stolicu kantona, w kotrymž bydli narod Retoromanow. Powjetšić? Na wobraz kliknyć!
Młody Šwicar Patrick Mächler piše tuchwilu před pruwowanjemi wjetše maturitne dźěło. Jako dźěše wo to, sej temu wubrać, rozsudźi so za to, zo přirunuje situaciju Retoromanow, Serbow a Walizičanow. Na prašenje, čehodla je runje mjenowane mjeńšiny wuzwolił, wotmołwi wón:
»Za Šwicarja je kročel, so z Retoromanami zaběrać, kotřiž wšak su poměrnje derje škitana mjeńšina w našim kraju, někak logiska. Chcych so tež z dalšej mjeńšinu, po móžnosći z teritorija za něhdyšim "železnym zawěškom", zaběrać. Wo Serbach běch w šulskim času hižo přednošował, woni su pola nas poměrnje njeznaći a jich wuwiće je jara zajimawe. Tuž rozsudźich so za Serbow. Z Retoromanami wjaza Serbow mj. dr., zo staj wobě rěči wot němčiny "wohroženej" a zo matej bohužel wobě rěči po zdaću dźeń a mjenje rěčnikow. Porno tomu wupytach sej jako kontrast Walizičanow.«
Swoju wědu čerpa šuler hłownje z literatury. Trjeba pak tež direktny kontakt ze Serbami a je tuž nastajił naprašnik. Prosy wo to, zo bychu čitarjo runjewonline.info jemu wupjelnjene naprašniki připósłali na jeho e-mailowu adresu.