Hornjoserbski online-leksikon

Hornjoserbska wikipedija, swobodny online-leksikon je skónčnje pod samostatnej adresu http://hsb.wikipedia.org/ přistupna. Z tym je jedna z něhdźe 250 oficialnych rěčnych wersijow mjezynarodneje syćoweje encyklopedije.

Po dołhim přihotowanskim času na wšelakich testowych a inkubaciskich serwerach je so tak wutworiła platforma za spřistupnjenje wědy tež w serbšćinje. Na rozdźěl wot testowych wersijow je nětko tež grafiski powjerch serbski. Wo přełožk zakładneje software běštaj so hłownje Michał Wolf a wužiwar pod pseudonymom Dundak starałoj.

Kóždy móže přinošować

Wosebitosć wikipedije je, zo móže kóždy ze swojej wědu přinošować, sam nastawki pisać abo dotalne polěpšować a porjedźować. Princip je jednory: Kóždy dodawa wědu ze swojeho fachoweho wobłuka – lěkarjo móhli krótke nastawki wo chorosćach a hojenskich metodach pisać, koparjo wo regulach a wosebitosćach swojeho sporta, rěznicy wo mjasach a swojich gratach, burja wo ratarskich nastrojach a plahowanych rostlinach, wučerjo móhli sami z krótkimi fachowymi tekstami přinošować abo šulerjow krótke fachowe teksty pisać dać atd.

Móžnosće wozjewjenja su jednore: Pak tłóčiš na čerwjeny (= prózdny) link a zapodaš do formulara swój tekst, pak tłóčiš na tłóčatko "wobdźěłać" a zapodaš sam nowy link. Tež to njeje ćežko, dosahatej róžkatej spince: [[mjeno nastawka]]. Składować – a hotowy je nowy prózdny wotkaz …

Hižo kopa hesłow

Na tute wašnje je mjeztym hižo kopa hornjoserbskich přinoškow tójšto wšelakich awtorow wot B kaž Budyšin hač do Ž kaž Žitawa nastało. Mjezdruhim móže sej zajimc natwar třěchi serbsce wobhladać, informacije wo nowym systemje Windos Vista čitać a tež bamž Benedikt XVI. je hižo w encyklopediji zastupjeny. Iniciatorojo wjesela so na dalše zhromadne dźěło z po móžnosći wjele awtorami.

Tež delnjoserbska wikipedija, kotrejež testowa wersija ma samo wjace přinoškow hač hornjoserbska, so bórze oficialnje do syće staji.