Serbski rozhłós po cyłym swěće

Serbski rozhłós - nětko po wšěm swěće přistupny!

Nowe lěto so hnydom z pozitiwnym podawkom započnje: Wot dźensnišeho wusyła Serbski rozhłós w syći. Štož sej Serbja zwonka Łužicy dawno přeja, je realita: Wšudźom na swěće hodźi so nětko program sćěhować.

Wuměnjenje je přistup do interneta a - kaž doma we Łužicy -, zo so připosłuchar Serbskeho rozhłósa zahe z łoža wudrapa. Prěnje wusyłanje wšak startowaše dźensa rano zdypkom 5.04 hodź. jako live stream.

Na oficialnych stronkach Serbskeho rozhłósa wupraja so wjednica Bogna Korjeńkowa wo zwoprawdźenju nowych móžnosćow tež za Serbow:

Wudobyće za Serbow a jich přećelow

"Nowe techniske móžnosće naše dźěło njesměrnje wobohaćeja. Wone podpěruja našu prócu wo hajenje serbskeje rěče (...) Runje młodźi Serbja, kotřiž su po Němskej a swěće rozbrojeni, njetrjebaja z tym zwisk k swojim korjenjam zhubić. Dźakowano internetej słyša woni nětko w kóždym kućiku swěta wšědnje najnowše nowinki a hudźbu domizny."

Tola nic jenož za Serbow samych je wusyłanje w syći wulki postup. Tež přećeljo Serbow po wšěm swěće drje tutu móžnosć z radosću witaja. Woni dyrbjeli wězo ewentualne časowe přesuwanje wobkedźbować.

Wot póndźele do pjatka wusyła so wot ca. 5.00 hodź. hač do 8.00 hodź., sobotu wot 6.00 hodź. do 9.00 hodź. a njedźelu wot 11.00 do 14.00 hodź.

Tež młodźinske wusyłanje "Satkula" hodźi so w syći sćěhować a to stajnje póndźelu wot 20.00 do 22.00 hodź.

Chceće serbski rozhłós w syći poskać? Stłóčće tu!

(Za słuchanje trjebaće software, kotraž zmóžnja wothrawanje live streama. Link funguje jenož za čas wusyłanjow.)

Chceće na strony Serbskeho rozhłósa? Stłóčće tu!