Kajki přichod ma katolska njewjesćinska drasta?

Serbski kwasny ćah. Kajki přichod wón ma?

- Njeje tutón outfit w swojej starodawnej podobje trochu zastarski?
- Njeměła so njewjesćinska drasta tež trochu modernizować?
- Štó smě dźensa scyła w čestnej njewjesćinskej drasće hić?
- Kotry wliw ma wuwiće towaršnostneho měnjenja wo čestnosći na prašenje katolskeje njewjesćinskeje drasty?

Telko prašenjow – a žana wotmołwa …

Redakcija internetoweho magacina runjewonline.info poskićuje wšěm młodostnym a dalšim zajimcam druhu „rozmołwu za serbskim blidom“. W škitanym rumje skići so składnosć, sej swoje měnjenje, ideje, prašenja k husto a horco diskutowanej temje wuměnić … a so tak wotmołwje bližić.

Swój wosobinski wid podadźa jako zawod: něhdyša a (ewtl.) přichodna serbska katolska njewjesta, serbski a němski młody muž. Jako fachowcy prošeni su tež braška, hotowarniča a duchowny.

Zarjadowanje budźe pjatk, dnja 16. februara 2007 w 19 hodź. w Budyskim Serbskim muzeju. Zdobom poskića so poslednja składnosć, sej wustajeńcu wo narodnej drasće katolskich Serbow z wjedźenjom muzejownicy Andreje Pawlikoweje wobhladać.

Wjeselimy so na zajimawy wječor!

redakcija runjewonline.info a moderatorka Bernadet Wjeselic