Dźěło z młodźinu

Spomožna publikacija - nowy wudźěłk přećela Serbow Leoša Šatavy.

Nazhonjenja, dožiwjenja a kontakty w młodźinskej starobje čłowjeka hustohdy čas žiwjenja do sylneje měry wowliwuja. Kopicu praktiskich namjetow nastupajo prašeni, kotre wliwy maja při wuwiwanju identity a poćaha k rěči wosebitu wahu a kotre naprawy móhli w tutym zwisku pozitiwnje skutkować, podawa Leoš Šatava w brošurje „Młodźina – rěč a identita“, kotruž je RCW spočatk lěta wudał.

Moderne wuhotowanje Simony Ćěslineje a mnohe fota wo serbskich młodostnych a jich aktiwitach do čitanja brošury wabja.

Tekst podawa načasnu argumentaciju za diskusiju z młodostnymi wo zapřijećach kaž narodnosć a etniskosć. Wobsahuje přikłady zajimawych naprawow, kotrež su druhe narodne mjeńšiny nałožowali, zo bychu swoju rěč wožiwili.

Předewšěm pak poskićuje namjety za naš serbski swět, kotrež móža přisporjeć fantaziju a kreatiwnosć serbskich agitatorow – hač w serbskich institucijach, mjez wučerjemi abo w młodźinskim dźěle skutkowacymi.

Z tym poskićuje so brošura wšitkim, kotřiž z dorosćacymi dźěłaja, ale wězo tež młodostnym samym, jako zakład diskusije a nastork za dźěło.