Prima póstnička

Centrifuga bě zaso kopaće połna.

Štóž znaje serbsku korčmičku w Lipsku wě, zo njeje w njej poprawom přewjele městna. Štóž pak tutu "Centrifugu" lěpje znaje wě, zo je móžno, wjace hač sto ludźi do njeje natykać.

Tak bě tež zašłu sobotu zaso, jako přeprosy Sorabija na swoju lětušu póstničku. Hosćo běchu hłownje studenća, kotřiž so w tamnych póstniskich radach angažuja. Woni dožiwichu hodźinski program ze skečemi, rejemi a spěwami.

Nowostka w scenje Lipšćanskich póstnic bě, zo bě kóždej radźe wosebity programowy dypk wěnowany. Tak předstajištaj Maik Herden a Konstantin Hüttner słowne hry wo temje "Na twarnišću" (za póstnisku radu BaHu). Alena Wjenkec, Matthias Čižank a Jan Rjeda zahrachu scenu wo tym, kak spyta njelegalne towarstwo dobyće němskeho mustwa při koparskich europskich mišterstwach zaručić (za DHFK).

Hanka Markec přednjese, na klawěrje přewodźena wot Feliksa Krämera, žortny spěw wo bio-płunje (za biologow). Při muskej reji wustupi tež Stefan Hamel.

Tamne skeče běchu wěnowane chemikarjam, skótnym lěkarjam, fyzikarjam a medicinarjam, póstniskej radźe hospodarskich wědomosćow a samo póstnicarjam z Jeny.

Wuhódnoćenje wšitkich přitomnych póstniskich radow po programje pokaza, zo su skeče a spěwy połnje do čorneho trjechili. Bjez dźiwa tuž, zo knježeše tež po „oficialnym dźělu“ dobra nalada ze serbskim spěwom a kołom, do kotrehož so tež němska wjetšina ze zahoritosću zapřija.