Zjawne posedźenje w Zabrodźe

Přichodnu sobotu, dnja 10. měrca w 9 hodź., wotměje so na žurli gmejnskeho doma w Zabrodźe, Wjesna droha 64, přichodne posedźenje Zwjazkoweho předsydstwa Domowiny.

Na dnjowym porjedźe steja mjez druhim informacije wjesneho předstejićerja Siegberta Bogotta wo spěchowanju serbskeje rěče a kultury w Zabrodźe a informacija Erwina Kowarja wo dźěławosći tamnišeje Domowinskeje skupiny.

W srjedźisću wuradźowanja steja přihoty na 13. Hłownu zhromadźiznu Domowiny. Mjez druhim diskutuje so naćisk rozprawy zwjazkoweho předsydstwa na hłownu zhromadźiznu a doporučenje k dźěłowym směrnicam za dobu přichodneju lět.

Dalši dnjowy dypk wěnuje so stawej nadźěłanja strukturneho namjeta ke kulturno-praktiskemu dźěłu a pod wšelčiznami wobjednaja so zhromadne stejišćo Serbskeje rady Sakskeje a Domowiny k naćiskej zakonja wo noworjadowanju teritorija wokrjesow kaž tež wobdźělenje Domowiny při nastajenju koncepcije za dalše wuwiće kónčiny Hornjołužiske haty a hola w dobje 2007 do 2013. Jan Nuk informuje wo stawje zjawneje diskusije wo naćisku šulskeje koncepcije initiatiwneje skupiny „Naše šule – šule za žiwjenje“ a dalše předwidźane kroki.

Posedźenje je zjawne, zajimcy su wutrobnje witani.

Dnjowy porjad posedźenja namakaće na internetnej stronje Domowiny www.domowina.de pod medijowymi wozjewjenjemi.