Wjace hač tysac nastawkow

Wurězk z nastawka wo třěchach w hornjoserbskej wikipediji. Powjetšić? Tu kliknyć!

Štó drje by sej myslił, zo so hornjoserbska wotnožka wjacerěčneho online-leksikona wikipedija tak spěšnje wuwije?

W běhu prěnjeho lěta (přir. rozprawje našeho online-magacina tu a tu) je nastało wjace hač tysac přinoškow z najwšelakorišich kategorijow. Najwjetši přirost nazhoni hornjoserbska wikipedija we wobłuku biologije. Nastawki wo rostlinach a klasifikacija tutych wučinjeja wulki dźěl dotalnych dopisow do hornjoserbskeho online-leksikona.

Wjele pomocnikow přinošowaše, zo by tež hornjoserbske syćowe składźišćo wědy dźensniše wobličo dóstało. Při nastajenju wšelakich předłohow a tabulkow pomhachu na př. ludźo, kotřiž ani serbsce njerozumja, maja pak za to nazhonjenja z formatowanjom teksta a programowanjom we wobłuku wikipedije.

Wosebje zwjeselace je, zo je zhromadnosć wikipedičanow tež wutworjenje delnjoserbskeje wikipedije přizwoliło. Testowa wersija tuteje ma hižo nětko wjace hač 200 přinoškow.