Wo zawrjenju běrowa

Po tym, zo šěrješe so spočatk meje powěsć, zo zawrěje zapósłanc Ligi pólskich swójbow (LPR) Chruszcz swój běrow w Budyšinje, jewja so nětko přinoški wo tym tež w pólskich medijach.

Wrocławske wudaće Gazety Wyborczej rozprawja wo jeho cofnjenju ze stolicy Hornjeje Łužicy. Při tym wospjetuje so zdźěla diskusija, kotraž jewješe so hižo 2005 při załoženju běrowa. W swojim nastawku wumjetuje Michał Kokot Chruszczej mj. dr., zo bě zarjadowanje Budyskeho běrowa jeničce wabjenska akcija. "W běhu dweju lět zapoda Chruszcz lědma jednu interpelaciju w Brüsselu", pisa Kokot a poćahuje so při tym na protest přećiwo zawrjenju serbskich šulow.

Tež w bjezpłatnym dźeniku Metro, kotryž wuchadźa w cyłej Pólskej z nakładom něhdźe 521.000 eksemplarow, jewi so nastawk z nadpismom "Dołžnik z europarlamenta". W nim skedźbnja so na to, zo zawostaji Chruszcz při zawrjenju něhdźe 1000 eurow dołha. "Wšitko tohodla, dokelž je mi europski parlament diety njedypkownje na konto přepokazał. (...) Slubju, zo w najblišim času wšitko zapłaću", wupraji so Chruszcz w Metro.