25.07.2007
Fabian Kaulfürst, Budyšin
Z folklorneho festiwala
© Michael Ruppert
Młody dudak ze swojim instrumentom.
Wot 19. do 22. julija 2007 wotmě so na wjacorych městnach Łužicy VII. mjezynarodny folklorny festiwal, kotryž přićahowaše syły přihladowarstwa z bliska a daloka. Programy w Budyšinje, Hochozy a Chrósćicach wuhotowachu sobuskutkowacy z Łužicy a cyłeho swěta.
Hižo štwórtk zahajištaj w Budyšinje měšćanosta Křesćan Šram a předsyda Domowiny Jan Nuk festiwal. Před kulisu Hroda wustupichu nimo domjacych ansamblow skupiny z Pólskeje, Čěskeje republiki, Ruskeje, Meksika, Indoneskeje a Španiskeje. Při tym jednaše so zwjetša wo zastupjerjow narodnych mjeńšin mjenowanych krajow. Tak předstajichu mj. dr. Kašubojo, Baskojo, Tatarojo swoju kulturu.
© Michael Ruppert
Wudworski folklorny ansambl prezentowaše hłownje serbsku folkloru. Sobotu wječor a njedźelu pak pokaza tež swoju słowaksku reju.
Pjatk wječor dožiwi Delnja Łužica nastupajo festiwal swoju premjeru: Syła sobuskutkowacych dojědźe sej do Hochozy, hdźež rejowaše a spěwaše so na wjacorych dworach a na swjedźenišću za cyrkwju. Bohužel nawalichu so wulke mróčele a dešća dla dyrbjachu so oficialne programy přetorhnyć. To boleše drje wosebje wobsedźerjow dworow a tych, kotřiž běchu při wuhotowanju statokow pomhali. Festiwalarjo wšak tłóčichu so we wjesnej žurli a pokročowachu tam po zakusku ze swojimi poskitkami. Serbskich wobdźělnikow zabawješe při tym wosebje zhromadne spěwanje z cimbalowej kapału folklorneje skupiny Vrtek z Opavy.
Sobotu wječor mějachu organizatorojo festiwala wjetše zbožo z wjedrom. Tysacy ludźi zabawješe so po mjeztym zwučenym wašnju na burskich statokach w Chrósćicach. Při tym dožiwichu přihladowarjo někotružkuli folklornu chłóšćenku - nic jenož z eksotiskich krajow, ale tež z Łužicy.
© Michael Ruppert
Rejowarki Wudworskeho ansambla při Słowakskej reji.
Njedźelniša Boža mša njewotmě so dešćika dla na swjedźeńskej łuce pod pomnikom padnjenych Polakow, ale w farskej cyrkwi. Mróčele wšak so bórze zhubichu a tuž móžeše program po planje pod hołym njebjom pokročować. Na hłownym jewišću dožiwi publiku mj. dr. prapremjeru zhromadneje produkcije serbskich skupin z Ćiska, Slepoho, Smjerdźaceje a Wudworja "Žiwa woda", za kotryž měješe Constanze Wendisch režiju. Wona bě tež teksty mjez jednotliwymi rejowanskimi scenami, kotrež čitaštej Mila Brukec a Kristina Nerad, wupytała.
Z galaprogramom wšitkich wukrajnych skupin kaž tež Wudworčanow a Smjerdźečanow zakónči so festiwal jako swjedźeń zhromadnosće kulturow, w běhu kotrehož stajachu so tež politiske akcenty. Mj. dr. skedźbni so wospjet na zawrjenje serbskich šulow.
Oficialne stronki festiwala "Łužica 2007" namakaće tu!