Skóńcnje ju mamy!

Dolnoserbska wersija oficialnego loga wikipedije.

Skóńcnje jo tak daloko! Mamy oficialnu dolnoserbsku wersiju wjelikeje seśoweje encyklopedije wikipedija. Pó dłujkem cakanju jo se projekt něnto z testowego serwera pśesunuł na oficialny serwer.

Chtož co raz do dolnoserbskeje encyklopedije póglědnuś, ga móžo to how cyniś: http://dsb.wikipedia.org.

Dokulaž bazěrujo ideja wikipedije na tom, až luźe sami sobu gótuju, ga móžo kuždy swóju wědu, swóje znajomosći mimo śěžow do seśi spóraś. Kuždy móžo za dolnoserbsku wikipediju artikle pisaś abo eksistěrujucy pśinosk wobźěłowaś.

Ga wopytajśo a cyńśo sobu!

Pśeto: Kuždy, kenž ma pśistup k internetej móžo něnto k rozrostoju toś togo bźezpłatnego projekta pśinosowaś a tak nic jano wědu wó Serbach, ale wósebnje wědu w serbskej rěcy šyriś.