Ptači kwas w Beiruće

Wobraz z arabskim wopisanjom Ptačeho kwasa w Beirutskich nowinach. Chceće cyły wobraz widźeć? Tu kliknyć!

Hižo někotre měsacy bydlu nětko w Libanonskej stolicy w Beiruće. Přeco zaso mějach wšak nuzu rozkłasć, štó Serbja su a zwotkel pochadźeja. Tuž spodźiwach so před tydźenjom jara, jako 26. januarja 2008 w našej tuhdyšej arabskej nowinje An-Nahar foto wo serbskim ptačim kwasu wuhladach! Mały tekst pod fotom rozprawja:

„Ptači kwas. Wuslěkane w narodnjej drasće Serbow (němska mjeńšina blisko pólskeje hranicy) rejujetaj tutej dwělětnej dźěsći stawiznu wo „Ptačim kwasu“. Tuta narodna legenda powěda, zo wuměnja ptački z dźěćimi słódkosće jako dźak za picowanje w zymje. (AB)“

Tež hdyž bě tekst pod fotom z někotrymi zmylkami posyty, so tola přez foto, kotryž bě na poslednjej stronje nowin woćišćany, wjeselich.

Prěnje strony nowiny rozprawjachu wšak wo cyle druhim podawku: Pjatk dnja 25. januarja 2008, jako přinjesechu łužiske ptački dźěćom hněžka a sroki, bě zaso awtowa bomba w křesćanskim dźělu Beiruta rozbuchnyła. Naša nowina kaž přeco dokładnje wopisowaše, što bě so hdy stało, kelko ludźi bě tutón raz zemrěło a štó móhł snano za njeskutkom tčeć. Jeničce w januarje dožiwichmy w Beiruće tři atentaty z awtowymi bombami a demonstraciju Shiītow, na kotrejž so wosmjo wot njeznatych spotřělichu. Jedna z hłownych přičin njeměrow je, zo nimamy wot kónca nowembra hižo prezidenta, dokelž njemóžeja so wšelake skupiny Libanona na naslědnika dojednać. Štó sej mysli, zo so kraj w tajkich njeměrnych časach w hołku a tołku podnuri, so myli. Wobydlerjo Libanona su wšelake njeměry zwučene, přetož hakle 1990 kónči so po 15 lětach ciwilna wójna. Šule a uniwersity wšak su po atentatach husto za dźeń zawrjene, ale potom so žiwjenje po zwučenym wašnju dale kuli. Přeco zaso wobdźiwam wobydlerjow Libanona za jich sćerpnosć a žiwjensku wolu. Tak wita mje předawar zeleniny Abu Machmud přeco z wulkim posměwkom, wšojedne hač hač je dźeń do toho bomba rozbuchnyła abo hač je runje ptači kwas!