Model do praksy přenjesć

Medijowa informatikarka Felicitas Šefrichec.

Rodźena Njebjelčanka Felicitas Šefrichec je w februaru 2008 swoje diplomowe dźěło wozjewiła (runjewonline.info rozprawješe). Kniha pod němskim titulom "Web w změnje – nowe wobłuki wužiwanja dawno znatych technologijow" zaběra so z wuwićom a móžnosćemi interneta. Při tym wuwiwa wosebity model za serbskich wužiwarjow syće. Tu čitaće naš interview z awtorku.

1. Kniha wěnuje so specifiskej tematice. Za koho je wona w prěnim rjedźe myslena?

Po mojim měnjenju stej to dwě skupince: Jónu su to informatikarjo a wšitcy, kotřiž zajimuja so za internet a techniku, kotraž za nim tči (wosebje Web 2.0, Ajax a perzonalizowane startowe strony). A zdruha wšitcy, kotřiž wužiwanje interneta (wosebje w Serbach) přepytuja.

2. Kelko "informatiskeje teorije" a kelko "serbskosće" jewi so w publikaciji?

To je někak połojca wot kóždeho. Po krótkim zawjedźenju zaběra so druhi kapitl knihi ze zakładami interneta: krótki stawizniski přehlad, standarty a gremije, přehlad wo technologijach a woznam zapřijeća "Open Source".

Třeći kapitl zaběra so z tematiku "Web 2.0": Što to je, kak je k tomu dóšło, kajke internetowe aplikacije a technologije k tomu liča a što ma so pod social software rozumić.

W štwórtym kapitlu wuwiwa so potom koncept za serbski internetowy portal we formje perzonalizowaneje startoweje strony. K tomu sym najprjedy naprašowanje k wužiwanju interneta w Serbach přewjedła. Hišće raz wutrobny dźak wšitkim wobdźělnikam. Na zakładźe wuhódnoćenja tutoho naprašowanja so trěbnosć tajkeho portala wotwodźuje. Po tym so druhe perzonalizowane startowe strony w interneće analyzuja a přirunuja. Tak nasta wobsahowy a techniski koncept za wotpowědnu serbsku webstronu. W techniskim koncepće so zakładne ideje přesadźenja kaž tež móžne technologije bliže wopisuja.

Diplomowe dźěło Felicitas Šefrichec. Wobraz powjetšić? - Tu kliknyć!

W pjatym kapitlu rozłožuje so jako model přesadźenje koncepta z programěrowanskej biblioteku YUI (Yahoo User Interface library) na zakładźe JavaScript. Zakónčacy kapitl zjima dźěło a w přiwěšku namaka so kompletne wuhódnoćenje naprašowanja.

3. Kak sy nakładnistwo namakała, kotrež by tajku specifisku publikaciju wudało?

Sobudźěłaćerjo nakładnistwa VDM su w interneće informacije k mojemu diplomowemu dźěłu namakali. Tuta firma je so na wudawanje tajkich wědomostnych publikacijow specializowała. Su mje narěčeli, hač nochcu swoje dźěło jako knihu wudać. Po jich měnjenju je tema, wosebje informatiski dźěl, aktualna a na wikach požadana. Chcych swoje wudźěłanje druhim k dispoziciji stajić a sym tuž poskitk rady přiwzała.

4. W swojim dźěle wuwiwaš předstawy wo serbskej syćowej aplikaciji. Hdy widźimy ju w praksy?

Sym aplikaciju we wobłuku diplomoweho dźěła jako model z wšelakimi funkcijemi přesadźiła. Bohužel je to jenož alfa-wersija, njeje hišće daloko wuwita. Tuchwilny program pokazuje jenož, kak móhł tajki portal wupadać. Nažel nimam po dźěle dosć časa, software dale wuwiwać. Je to wjetši projekt, kotryž móže so jenož z wjele časom a zhromadnje z druhimi zajimowanymi (serbskimi) informatikarjemi přesadźić. Snano so zajimcy za to namakaja.

Wutrobny dźak za rozmołwu. Přejemy Tebi a nam wšitkim, zo hodźi so předewzaće prawje bórze zwoprawdźić.

za runjewonline.info so prašał: Fabian Kaulfürst

Tuchwilny staw projekta móžeće sebi tu wobhladać. Dla pobrachowaceho časa to tuchwilu jenož w Mozilla Firefox porjadnje funguje.