Pasion po swj. Janu

Wabjenski plakat za předstajeni w Budyšinje a Chrósćicach. Chceće cyły plakat widźeć? Tu kliknyć!

Po wuspěšnym tradicionalnym wustupje Serbskeho studentskeho chóra na lońšej Schadźowance a po sobuskutkowanju na hodownym koncerće chóra "Meja" předstaji młodźinske ćěleso skónčnje ryzy swójski projekt: Serbski pasion po Janu.

Zašłu Schadźowanku wustupi Serbski studentski chór prěni króć pod nawodom Tomaša Kole, kotryž skutkuje jako organist w Gotha. Dokelž je zhromadne dźěło telko wjesela činiło, njepřińdźe jemu a jeho bratrej Clemensej jenož do mysli, chór "Meja" při předstajenju wurězkow oratorija "Zyma" po hodźoch zesylnić, ale tež swójski koncert wuhotować.

Poprawna ideja běše Bachowy pasion předstajić, doniž njerozsudźištaj so bratraj, samaj sadźby na pasion po Janu komponować.

Chór a solistow dožiwić móžeće sobotu 15. měrca 19.00 hodź. w Budyskej serbskej a njedźelu 16. měrca 17.00 hodź. w Chróšćanskej wosadnej cyrkwi.