06.03.2008
Fabian Kaulfürst, Budyšin
Wubědźowanje za dźěći a młodźinu
© www.volkskultur.sorben.com
Tež dźěćina pěstuje nałožk jejkamolowanja. Wobraz powjetšić? Tu kliknyć!
Spěchowanski kruh za serbsku ludowu kulturu z.t. přewjedźe nětko tež wubědźowanje wo najrjeńše serbske jutrowne jejko za dźěći a młodźinu.
Po tym, zo je lětuše wubědźowanje za dorosćenych zakónčene, smě nětko młódša generacija (hač do 24 lět) swoju wušiknosć pokazać.
Do hódnoćenja zapřijeja so jejka, za kotrychž debjenje je so jedna ze sćěhowacych technikow wužiwała:
- wóskowanska technika / jedno- a wjacebarbna
- škrabanska technika
- wužrawanska technika
- wóskowa-bosěrowanska technika / jedno- a wjacebarbny wósk
Wězo dyrbja so tute techniki z tradicionalnymi srědkami nałožować (pjerja, jehlički, nóž za škrabanje).
Na jednu kolekciju dyrbitej so dwě jejce zapodać. Kóždy wobdźělnik pak smě so z wjacorymi technikami wobdźělić.
Zajimcy njech njezabudu swoje mjeno a dospołnu adresu napisać. Tež staroba dyrbjała so naspomnić, dokelž hódnoći so po wšelakich starobnych skupinach.
Swoje kolekcije móža młodźi debjerjo hač do 26. 3. 2008 w Serbskej kulturnej informaciji w Budyšinje, w Choćebuskej "Lodce", w běrowach Domowiny w Slepom, Wojerecach a Chrósćicach wotedać.
© www.volkskultur.sorben.com
Serbske jutrowne jejka - woprawdźite drohoćinki! Wobraz powjetšić? Tu kliknyć
Dobyćerjam kiwaja pjenježne myta mjez 10 a 25 eurami. Nimo toho je młodźinske spěchowanske myto z 75 eurami dotěrowane. Po wubědźowanju dóstanje kóždy swoje kolekcije wróćo, jenož dobyćerske jeja młodźinskeho spěchowanskeho myta wustaja so hromadźe z dobyćerskimi kolekcijemi dorosćenych.
W swojej medijowej zdźělence pisa kružk: "Nadźijamy so, zo so wjele šulerjow a młodostnych na wubědźowanju wobdźěli a wjeselimy so hižo na Waše twórby."
Tež runjewonline.info přeje tym swojim čitarjam, kotřiž so z debjenjom jutrownych jejkow zaběraja, wjele wuspěcha!