Čińće sobu!

To su wuwołaki, Bóh dał nic wotćišće stopow, kotrež wjedu do ćmoweho přichoda. Manifestacija woła! Žadajmy swoje prawa. Žadajmy, zo so Zwjazk a krajej skónčnje dojednaja a škit mjeńšinow chutnje bjeru!

Zawodne a personelne rady wšitkich serbskich institucijow přeprošuja wšitkich Serbow a jich přećelow na zhromadnu manifestaciju w Budyšinje. Hdy, hdźe, kak? Čitajće sami!

Namołwa

Namołwjamy wšitkich Serbow a přećelow Serbow, wšitkich čłonow serbskich towarstwow kaž tež wšitkich přistajenych serbskich institucijow k zhromadnej manifestaciji.

Žadamy sej wotzamknjenje dołhodobneho financneho zrěčenja mjez Zwjazkom, Braniborskej a Sakskej, w kotrymž so projektowe a institucionelne spěchowanje serbskeje rěče a kultury w dosahacej wysokosći garantuje.

Wobaramy so přećiwo wukrawjenju serbskeje rěčneje a kulturneje krajiny. Přitřihanje budgeta Załožby za serbski lud wjedźe wšitke prócowanja a wuspěchi zašłych lět ad absurdum.

Wot Zwjazka planowane postupne redukowanje spěchowanskich pjenjez za serbske projekty a institucije potrjechi kóždeho Serba! Bjez profesionelneje podpěry njemóža serbske lajske rejwanske, spěwne a dźiwadłowe skupiny swój wysoki niwow zdźeržeć, njemóža dobre serbske knihi, nowiny a časopisy za wšitke starobne skupiny wuchadźeć.

Žadamy sej wot politikarjow, zo bychu ze swojej awtochtonej mjeńšinu z respektom wobchadźeli!

Zetkamy so póndźelu, 17. měrca w 16.30 hodź., na dworje Serbskeho instituta na Dwórnišćowej 6 w Budyšinje, zo bychmy swój protest po cyłym Budyšinje roznosyli.