Jasne žadanje

Rěčnik za prawa Serbow: Předsyda Domowiny Jan Nuk.

Dnja 12. měrca 2008 zetka so Zwjazkowe předsydstwo Domowiny w 17.00 hodź. na žurli Serbskeho domu w Budyšinje. Po přednošku sobudźěłaćerja Serbskeho instituta dr. Pětša Šurmana, kotryž předstaji dźěl stawizniskich slědźenjow na temu Serbskeho zakonja, kotryž přiwza Sakski krajny sejm před runje 60 lětami, zaběrachu so woleni zastupjerjo wosebje z tuchwilnej financnej situaciju.

Při tym skedźbnichu wospjet na to, zo ćerpja Serbja tuchwilu pod njekmanosću krajow Sakska a Braniborska a Zwjazka, so mjezsobu na zhromadne postupowanje při spěchowanju Serbow dojednać.

Po intensiwnej diskusiji wozjewi gremij tuž sćěhowace stejišćo:

„Zwjazkowe předsydstwo Domowiny – Zwjazka Łužiskich Serbow z.t. žada sej wot pjenjezydawarjow Załožby za serbski lud, zo so přiražki w trěbnej měrje, kaž su w ‘Memorandumje k dalšej eksistency serbskeho luda w Zwjazkowej republice Němska’ jako najniša hranica přiražkow za nowe financne zrěčenje zapisane, k dispoziciji staja.

Za lěto 2008 so w memorandumje žada minimalna suma we wysokosći 16,4 mio. Euro a za naslědne lěta přiměrjenje k wuwiću kóštow. Podkročenje žadaneje najnišeje hranicy přiražkow wjedźe njewotwobrotnje k zawrjenju za zachowanje serbskeje rěče a kultury njeparujomnych unikatnych serbskich institucijow. Za tutón pad wočakuje Zwjazkowe předsydstwo Domowiny wot serbskich čłonow Rady Załožby za serbski lud, zo so na wobzamknjenjach k rozpušćenju serbskich institucijow njewobdźěla a namołwja jich, sobuskutkowanje w Załožbowej radźe wusadźić.”