wućišćeć | pósłać

redakcija – 20.03.2005

Zeńdźenje młodźinskich klubow a PAWKa w Chrósćicach

Pytaja za zhromadnej nitku

Přichwatali su z Wotrowa, Nuknicy a Prawoćic, z Hórkow kaž tež Worklec, Njebjelčic, Konjec a Noweje Wjeski: něhdźe 40 zastupjerjow a přećelow młodźinskich klubow. Zeńdźechu so pjatk, 18. měrca 2005, wječor w Chrósčanskej „Jednoće“. Župa „Michał Hórnik“ bě jich a zdobom towarstwo PAWK na rozmołwu přeprosyła, zo by so towarstwo młodostnym předstajiło. Kaž bě ze stron młodostnych słyšeć, je wjesna młodźina tutomu towarstwu pječa hišće kusk daloka, byrnjež so mnohe wěcki, kiž PAWK organizuje, hižo „přimnyli“. Hač je so napletła nitka k dalšim zhromadnym aktiwitam – kaž silwesterskej party w Chrósčan šuli – so w přichodźe pokaza.

Zo ma PAWK swój běrow w pincy Serbskeho domu, to mnozy prěni raz słyšachu (zachod je hnydom wotprawa wrotow do dwora). Tola systematisce wosobinske styki k 46 klubam w serbskim sydlenskim rumje dźeržeć – to PAWK na čestnohamtskej bazy zawěrno njedočini. Dołhož bě Michał „Černo“ Brězan w běhu swojeho SAM-časa pola PAWKa „won“ jězdźił, bě to klubam jara wunošne, jedyn z wobdźělnikow měnješe. Młodźinski koordinator, za kotrehož je lětsa k 1. aprylej městno přilubjene, změje potajkim z wěstosću dźěła dosć!

Jako wěsty wjazacy element bu nasćěnowa protyka PAWKa derje přiwzata, wšako mnohe za młodźinu zajimawe terminy podawa. Dojednachu so, zo PAWK informacije swojeje protyki z e-mailowym wokolnikom aktualizuje. Kluby trjebaja swoje terminy za zarjadowanja, na kotrež chcedźa hosći přeprosyć, potajkim jenož sčasom zapodać. „Najrjeńšo by było, hdy by kóždy tydźeń něhdźe něšto serbske było, zo móhli so tež ći zetkać, kotřiž su wotydźenja w zapadźe“, měnješe jedyn. To pak njeměli jenož partije być, bě dalše měnjenje, ale skerje wěcki kaž kónctydźenski camp w lěsu, kotryž bě PAWK organizował – „party dźě chětře zabudźeš, ale na tajke něšto so čłowjek čas žiwjenja dopomina“. Wšelake wjerški, kiž móža Serbja zhromadnje z młodostnymi narodnych mjeńšin druhich krajow dožiwić, wšak běchu čłonki PAWKa na tutym wječoru hižo předstajili.

Młodźinska redakcija SN wabješe za to, zo bychu w klubach serbski dźenik, předewšěm młodźinske wudaće, čitali. Štóž chcył młodźinje tajki abonement darić, njech so přizjewi.

Redakcija RUNJEWONLINE.info pak přeprosy wšitkich na rozmołwny wječork, kiž budźe pjatk, 22. apryla 2005 w 19.30 hodź. (městnosć so hišće wozjewi). Budźe to prěnje zarjadowanje našeje redakcije, na kotrymž so RUNJEWONLINE.info předstaji. Předewšěm pak poskićamy zajimcam diskusiju wo temach, wo kotrychž so w našim online-magacinje pisa abo w přichodźe pisać móhło.

Chceće swoje měnjenje k tutemu přinoškej wozjewić?
Wobdźělće so na našej diskusiji!