Serb ministerski prezident?

Póndźelu dopołdnja překwapichu nowiny "Financial Times Němska" z powěsću, zo chce dotalny ministerski prezident Sakskeje Milbradt wotstupić. Wjacore medije tutu powěsć wozjewichu. Připołdnju w dwanaćich potom stupi Milbradt před mikrofony.

Tam wozjewi wón: "Sym so rozsudźił, šěsnaće měsacow do přichodnych wólbow do krajneho sejma zastojnstwo jako ministerski prezident Swobodneho kraja Sakska a jako předsyda sakskeje CDU naslědnikej přepodać." Jako konkretny termin pomjenowa Milbradt 24. meju a namjetowaše zdobom Serba Stanisława Tilicha, kotryž bě dotal minister za financy, jako swojeho naslědnika. Konkretnje k tomu wozjewi: "Stanisław Tilich (...) je mócny a nazhonity politikar, kotryž je hižo dopokazał, zo móže wón Swobodny kraj dale doprědka přinjesć."