07.05.2008

Iniciatiwna skupina zawodnych a personalnych radow serbskich institucijow, Budyšin

Demonstracija 29. 5. 2008

Do Berlina!

Kaž w Budyšinje, tak chcedźa Serbja tež w Berlinje přećiwo skrótšenjam protestować.

Naš protest, kiž smy dnja 17. měrca po hasach Budyšina demonstrujo zwuraznili, njejsu zamołwići prawdźepodobnje słyšeli. Tohodla wospjetujemy swoje žadanja a pojědźemy do Berlina.

Namołwjamy wšitkich Serbow a přećelow Serbow, wšitkich čłonow serbskich towarstwow kaž tež wšitkich přistajenych serbskich institucijow k zhromadnej manifestaciji.

Žadamy sej wotzamknjenje dołhodobneho financneho zrěčenja mjez Zwjazkom, Braniborskej a Sakskej, kotrež projektowe a institucionelne spěchowanje serbskeje rěče a kultury w dosahacej wysokosći garantuje a stupace kóšty wobkedźbuje.

Wobaramy so přećiwo wukrawjenju serbskeje rěčneje a kulturneje krajiny. Přitřihanje budgeta Załožby za serbski lud wjedźe wšitke prócowanja a wuspěchi zašłych lět ad absurdum. Wot Zwjazka planowane postupne redukowanje spěchowanskich pjenjez za serbske projekty a institucije potrjechi kóždeho Serba! Bjez profesionelneje podpěry njemóža na přikład serbske lajske rejwanske, spěwne a dźiwadłowe skupiny swój wysoki niwow wobchować, njemóža serbske knihi, nowiny a časopisy za wšitke starobne skupiny wuchadźeć.

Žadamy sej wot politikarjow, zo bychu ze Serbami, awtochtonej mjeńšinu w Němskej, z respektom wobchadźeli!

Zetkamy so štwórtk, 29. meje 2008, w 15.45 hodź. w Berlinje

na Augusta Bebelowym naměsće / Pod Lipami (Unter den Linden).

Busy so staja, jězbne kóšty 10 eurow; přizjewjenja do 15. meje 2008 pod:

Busy wotjědu w Budyšinje w 11.30 hodź. (konkretne městno so hišće wozjewi). Štóž chce z Chrósćic abo Pančic jěć, njech to w Serbskej kulturnej informaciji w Budyšinje zdźěli.