wućišćeć | pósłać

Fabian Kaulfürst, Budyšin – 10.09.2008

Serbskorěčne kubłanje w pěstowarnjach

Fachowa konferenca

Dźěćo, kotrež nosy serbski postrow na jazyku a na hrudźi ...

20. septembra 2008 wot 9.00 do 14.00 hodź. přewjedźe Rěčny centrum WITAJ (RCW) w Ćisku pola Wojerjec na žurli hosćenca "Zeleny wěnc" fachowu konferencu pod hesłom "WITAJ-projekt w pěstowarnjach Hornjeje a srjedźneje Łužicy – mjezybilanca a zhladowanje do přichoda". Patronat za zarjadowanje je přewzało Sakske statne ministerstwo za socialne.

Na konferency ma so bilancować staw mjeztym 10 lět eksistowaceho dwurěčneho kubłanja po metodźe imersije ("zanurjenje do cuzeje rěče") w Hornjej a srjedźnej Łužicy. Wobswětlić maja so wosebje praktiske nazhonjenja kubłarjow, nošerjow a staršich.

Zakłady a mjezybilanca

Na konferency porěči Jan Bart wo zakładach a lěpšinach imersije w serbšćinje. Jadwiga Kaulfürstowa bilancuje wuwiće WITAJ-projekta w pěstowarnjach, w kotrychž jenož wěste skupiny metodu zanurjenja do serbšćiny nałožuja (WITAJ-skupiny). To nastupa na př. pěstowarnje na Horach, w Čornym Chołmcu, Myšecach, Rakecach a Radworju.

Staw přiswojenja serbšćiny a němčiny

Při hrě a zabawje so najspěšnišo rěč wuknje - w pěstowarni a pozdźišo.

Staw přiswojenja serbšćiny a němčiny w serbskich pěstowarnjach, kotrychž nošer je Serbske šulske towarstwo, předstaji Ludmila Budarjowa. Wuslědki swojich přepytowanjow rěčnych zamóžnosćow dźěći we WITAJ-pěstowarnjach a WITAJ-skupinach prezentuje dr. Jana Šołćina.

Dožiwjenja doma, w pěstowarni a šuli

Swoje nazhonjenja při dwurěčnym kubłanju dźěći ze swójbow, kotrež doma přewažnje němsce rěča, předstaji pěstowarka Rakečanskeje pěstowarnje "Palčikowy kraj" Lejna Šołćina. Z perspektiwy němskorěčneje maćerje wobswětli Doreen Pachsteffel ze Židźinoho wšědne dožiwjenja swójby, kotrychž dźěći so na WITAJ-projekće wobdźěleja. Swoje nazhonjenja z dźěćimi, kotrež su WITAJ-projekt přešli, w šuli předstaji wučerka Zakładneje šule "Handrij Zejler" we Wojerecach, Regina Kumerowa.

Wid nošerja a wukubłanje kubłarjow

© Michael Ruppert

Tež w slepjanskej wokolinje wuknu dźěći po modelu WITAJ serbsce.

Wid nošerja na zarjadowanje a wobhospodarjenje WITAJ-skupiny dokumentuje Carina Israel z wokrjesneho zwjazka Łužica Dźěłaćerskeho dobroćelskeho skutka (AWO).

Aspekt wukubłanja kubłarkow a kubłarjow z wusměrjenjom na WITAJ-model wobswětli Claudia Winarjowa ze Serbskeje fachoweje šule za socialnu pedagogiku w Budyšinje.

Dale tak - a hinak!

Při wšěch wuspěchach, kotrež hodźa so dźesać lět po zawjedźenju WITAJ-projekta objektiwnje zwěsćić, namakaja so wězo tež dypki, hdźež hodźało so hišće něšto polěpšić. Diskusijne impulsy k tajkemu efektiwizowanju poda Jadwiga Kaulfürstowa.

Organizatoriske informacije

Městnosć: hosćenc "Zeleny wěnc", Budyska dróha 22, 02977 Wojerecy / Ćisk

Konferencna rěč: přewažnje serbšćina ze simultanym přełožkom do němčiny

Konferencny popłatk: inkl. konferencneje mapy, dokumentacije konferency, wobjeda a napojow 10,00 € (za studentow 5,00 €)

Zarjadowanje móže so jako dalekubłanje wotličić. Wobdźělenje so pisomnje wobkrući.

Dalše informacije a konkretny wotběh konferency namakaće na stronkach RCW.

Chceće swoje měnjenje k tutemu přinoškej wozjewić?
Wobdźělće so na našej diskusiji!