Serbšćina – spěwana europska rěč

Wustup Wólbernosćow w Praze. Za wjetši wobraz tu tłóčić!

Pjatk, 26.9.2008 wustupi skupina Wólbernosće we hłownym měsće Čěskeje a pokaza z lóštnymi melodijemi na to, zo je serbšćina žiwa europska rěč.

W cyłej Europje wotměwa so stajnje 26. septembra dźeń rěčow. Lětsa bě tež serbšćina aktiwnje słyšeć, a to we wobłuku swjedźenja w najwjetšim nakupnym centru Prahi, tak mjenowanym Palladiu, na kromje historiskeho jadra města. 11 kulturnych institutow hłowneho města Čěskeje běchu wulku akciju pod nawodom Goethoweho instituta wuhotowali, a to z tójšto kulturnymi programowymi dypkami, wulkim kwisom a wšelakorymi móžnosćemi so wo europskich rěčach informować.

Wjeršk dnja bě přepodaće mytow kulturneho kwisa, na kotrymž bě so 250 zajimcow wobdźěliło. Tutu swjatočnu hodźinu wuhotowaše spěwna skupina Wólbernosće, kotraž zawjeseli připosłucharjow ze swojej hudźbu, kotraž wobsahowaše nimo serbskich spěwow tež melodije z druhich europskich krajow.

Za pisany hudźbny wustup podźakowachu so wjednicy wobdźělenych kulturnych institutow a zastupjerjej ministerstwa šule, młodźiny a sporta, Eva Bartoňová a Jindřich Fryč. Ministerstwo bě nad cyłej akciji patronat přewzało.