Skóńcnje online

Wurězk z nowego internetowego portala.

Žeden žort: Wót 1. apryla jo nowy internetowy portal Serbskego instituta w interneśe. Gromaźe z firmu ISS Oberlausitz su sobuźěłaśerje w slědnych tśich mjasecach wobšyrnu informacisku seś wó źěłabnosći institucije, ale teke wó Serbach pśigótowali, kótaraž wopśimjejo tuchylu pśisamem 250 menijowych dypkow.

Głowne rěcy portala su górnoserbšćina, dolnoserbšćina a nimšćina, w slědujucych tyźenjach jo wótmyslone, až se wšake informacije teke engelski a rusojski spśistupniju.

Woglědarje na bokach mógu se informěrowaś wó konkretnych sobuźěłaśerjach a jich slěźarskich projektach a mógu něco wuzgóniś wó publikaciskem statkowanju wědomnostnego instituta. Wósebnosć jo menijowy dypk "Serwis", źož prezentěruju se pśednoski a póraźowanja, kótarež wědomnostniki póbituju. Za praksu wjelgin dobra wěc jo pśistup k wšakim datowym bankam, ako su to Serbska bibliografija, Nimsko-dolnoserbski słownik abo wucbnica górnoserbšćiny.

A aby pśecej wšykne wěźeli, co dajo nowe w Serbskem instituśe, jo se zarědowała rubrika „Aktualne“, kótaraž informěrujo wó zarědowanjach, na pś. wó konferencach a rěcnych kursach abo nejnowšych publikacijach.