Nalěćo w nazymje

Na podawki měrliweje rewolucije 1989 w Serbach spomina so na zarjadowanju Maćicy Serbskeje pjatk, 13. nowembra 2009, w 19.00 hodź. w Dźiwadle na hrodźe w Budyšinje. Stawiznar dr. Timo Meškank z Lipska rysuje w swjedźenskim přednošku podawki politiskeho přewróta w Serbach a prócowanja wo wobnowjenje Domowiny.

Někotre filmowe wurězki z tehdyšich serbskich zarjadowanjow posrědkuja na spočatku zaćišć přewrótoweho časa. Přednošk hudźbnje wobrubitaj Claudius von Wrochem (Glanegg/Korutanska), violoncello, a Yoriko Ikeya (Berlin), klawěr. Zaklinča „Canti per Violoncello e Piano“, jedna z hłownych twórbow komponista Jura Mětška z Budyšina. Na kóncu budźe składnosć k diskusiji.

Zarjadowanje słuša do rjada „Nadźija nazymy. Budyšin 89“. Wone je w serbskej rěči, zdobom poskići so simultany přełožk do němčiny. Zastup je darmo.