wućišćeć | pósłać

Fabian Kaulfürst, Budyšin – 11.04.2010

Maćica Serbska

Wuspěšna wólbna hłowna zhromadźizna

© www.macica.sorben.com

Sławni maćicarjo před něhdyšim Maćičnym domom.

Hižo tójšto lět přewjedźe jedne z najstaršich serbskich towarstwow, Maćica Serbska, swoju hłownu zhromadźiznu sobotu po jutrach. Tež lětsa zeńdźe so dnja 10. apryla 2010 zaso na 45 čłonow a zajimcow, mjez nimi tež přećeljo Serbow z wukraja, na žurli Serbskeho muzeja w Budyšinje, zo bychu towarstwowe naležnosće rjadowali a diskutowali.

Z dypkom w 14:00 hodź. powita Marko Kowar, kotryž zhromadźiznu wjedźeše, přitomnych. Sćěhowaše rozprawa předsydy Jana Malinka, čemuž přizamknychu so rozprawy wo dźěławosći jednotliwych sekcijow a komisijow Maćicy Serbskeje. Trochu wobšěrnišo předstaji dźěławosć sekcije hudźby jeje nawoda Měrko Šołta, kotryž namjetowaše na kóncu swojeho referata, zo dyrbjało so towarstwo wo to starać, zo staji so serbske hudźbne herbstwo pod škit Unesco. Přitomni rozsudźichu w běhu popołdnja, zo měło předsydstwo wotpowědne kroki w tutym zmysle pruwować. Po oficialnych rozprawach porěča spontanje hišće Jurij Šołta z Noweje Wjeski wo zasłužbnym čěskim přećelu Serbow Malotinje, na kotrehož ma so lětsa w septembru spominać. Při tym skedźbnja wosebje na to, zo nahromadźi Malotin w Praskich antikwariatach wjace hač 1000 zwjazkow serbskorěčnych ćišćow a zo je jeho knihownja dźensa w muzeju w Čěskej Lipje přistupna.

Po krótkej přestawce wuzwolichu přitomni čłonojo nowe předsydstwo, do kotrehož słušeja nětko dr. Anet Brězanec, Jěwa-Marja Čornakec, Janka Pěčkojc de Lévano, dr. Christiana Piniekowa, dr. Anja Pohončowa, Marka Kowarja, Jurij Łušćanski a dr. Pětš Šurman. Za předsydu wuzwolichu znowa superintendenta Jana Malinka.

Po wólbach porěča sobudźěłaćer delnjoserbskeje wotnožki Serbskeho instituta, dr. Pětš Šurman wo skutkowanju Jordanec swójby w Delnjej Łužicy, z čimž pokaza zdobom na wusku zwjazanosć a splećenosć wobeju Łužicow.

W druhim swjedźeńskim přednošku wěnowaštej so dr. Anet Brězanec a Hanaróža Šafratowa z Budyskeho Serbskeho instituta něhdyšej Maćičnej bibliotece a jeje tuchwilnemu stawej we wobłuku Serbskeho kulturneho archiwa resp. Serbskeje centralneje biblioteki. Skedźbništej zdobom na wuspěchi při digitalizowanju drohotnych rěčnych pomnikow a pokazaštej na to, zo mějachu tež w zašłych lětach w archiwje kedźbyhódne přirosty. Mjez druhim namaka so němska agenda z lěta 1652, do kotrejež je z ruku serbski přełožk zapisany.

Jako přikład za poradźene restawrowanske dźěło móžeštej přednošowarce hromadźe z předsydu Malinkom runje ponowjeny eksemplar prěnich serbskich spěwarskich z lěta 1710 prezentować. Zapłaćiło je so dźěło z pomocu pjenježneho dara priwatnika, pochadźaceho z wokoliny Ketlic. Derje, zo je so restawracija w lěće 300teje róčnicy tutoho bjezdwěla wažneho podawka serbskich stawiznow přewjesć móhła. Superintendent Malink skedźbni zdobom na to, zo ma lětsa tež aktualizowane wudaće serbskich spěwarskich wuńć.

Čłonojo wotžohnowachu nimo toho namjet předsydstwa, zo měli so myta za sorabistiske dźěło šulerjow Delnjoserbskeho gymnazija (myto Šwjele), Budyskeho Serbskeho gymnazija (myto Hórnika) a za studentow abo njedawnych absolwentow uniwersity (myto Muki) zawjesć.

Chceće swoje měnjenje k tutemu přinoškej wozjewić?
Wobdźělće so na našej diskusiji!