05.05.2010
Manfred Hermaš, regionalny rěčnik Domowiny, Rowno
Słuchanska CD wušła
„Z mójogo žywjenja – Hanzo Njepila-Rowniski hulicujo“ rěka titul słuchanskeje CD z tekstami Rowniskeho połbura Hansa Njepile (1761-1856), w kotrychž rozprawja wo swojim wšědnym dnju. Wudawaćelka je župa Běła Woda/Niska. CD je přinošk w zmysle žadanja lětušeje župneje hłowneje zhromadźizny, zo je wjace projektow k spěchowanju Slepjanskeje narěče trěbnych.
Z tym maja wšitcy lubowarjo Slepjanskeje narěče, slawisća a dalši zajimcy prěni raz składnosć, tutu narěč, kotruž jenož hišće mało ludźi w Slepjanskej kónčinje rěči, na zwukonošaku słyšeć
Pjatk, dnja 30. aprila 2010, přepoda regionalny rěčnik Manfred Hermaš (1. wotlěwa) předsydźe towarstwa Njepilic dwór z. t. Manfredej Nikelej (2. wotlěwa) prěnje eksemplary. Nahrawanja buchu z podpěru SAEK Budyšin realizowane, na foće nawoda tutoho zarjadnišća Michał Cyž (2. wotprawa). Redakciju měješe Božena Braumanowa, sobudźěłaćerka Domowiny za Slepjanski region.
CD dóstanu zajimcy na Njepilic statoku w Rownom, w Slepjanskim regionalnym běrowje Domowiny a bórze tež w Choćebuskej Lodce a Budyskej SKI za škitnu płaćiznu 3,50 euro.