wućišćeć | pósłać

Bernd Pittkunings, Dešno – 26.01.2005

Což mě mucy

Wid něgajšnego cesnoamtskego

W našom casu jo kuždy „ekspert“, kenž možo do mikrofona kwasliś abo swojo woblico pśed kameru pokazaś. Zwětšego se wuznaju take eksperty jano na swojom polu, jolic až scełego. Ale na žeden pad njeglědaju na wuspěch swojogo statka.

Pśikład za to jo něnto, až ceła mań wotposłańcow nimskich sejmow a sejmikow ma „podlańsku zasłužbu“. Pśedsedarka CDU Angela Merkel jo groniła, toś ta wěc njejo nic za mjenanje mjazy stronami. A to ned wěrim, dokulaž skoro z kuždeje strony su luźe potrjefjone. Na tom městnje cu na pśikłaźe kněni Wenddorf z Dolneje Sakskeje pokazaś, což mě mucy, gaž nastupnosć wobglědujom.

Podla swojogo mandata w sejmje Dolneje Sakskeje źěła kněni Wenddorf ako pśełožowarka za VW. Za to dostanjo kužde lěto 60.000 eurow resp. 5.000 eurow na mjasec. Pśestajarje za romany a beletristiku zasłužuju w toś tom casu pśerěznje jano 2.000 eurow. To znani k prědnemu, až musy Wenddorf ekspertka byś ako howac žedna. K drugemu jo taka suma dopokaz, až źěła wšednje minimalnje wosym goźin za VW. Pšašam: Gdy źěła za luźi swojogo zwězkowego kraja? To jo jeje słužba, dokulaž toś te luźe su ju wolili do sejma a płaśe ze swojimi dankami teke jeje myto a rentu. Njejsom był nejlěpšy w matematice, ale mogu licyś. Wona źěła wosym goźin ako wotposłańca, jězdźi goźinu tam a sem na źěło, ma tam někak goźinu pśestawki, musy doma snědaś a wjacerjaś, někak goźinu, trjeba za hygienu a šminkowanje dwě goźinje, pśełožujo wosym goźin za VW a spi šesć goźin. Samo jolic až nikula do knigłow njeglěda, daniž do telewizora, ma źeń kněni wotposłańce 26 goźin! W lěśe Einsteina mam to za fenomenalne! A naša luba ekspertka njejo jadnučka w nimskich sejmach a sejmikach, kenž njamožo wot myta jadnogo źěłodawarja swojźbu zažarbowaś a togodla pśewinjo stwortu dimensiju – cas. Nanejmjenjej taku dimensiju.

Wona jo głownoamtska wotposłańca, togodla jo to wšykno legalne po nimskich kaznjach. Druga wěc by była, gaby se procowała cesnoamtski. Z lěta 2001 (to jo było „Lěto cesnego amta“) muse cesnoamtske luźe płaśiś za ewentualne narownowanje wudankow kuždy mjasec wušej 50 eurow dankow. Gaby jaden bźezdźěłabny měł taki amt, ga by jomu wšykne pjenjeze wušej 50 eurow wot podpěrowanja wotśěgnuli. Pśi tom jo jadno, wjele wudankow w tom amśe za bencin, drastwu, knigły, struski atd. ma. To znani za takego, až by dał hyšći wot swojich drobnych pjenjez za swoj cesny amt. Togodla som 2003 wotstupił ako cesnoamtski zagronity za serbske nastupnosći wokrejsa Dubja Błota (Dahme Spreewald). Nowego njejsu namakali, ale hyšći źinsa płaśim togo amta dla kužde lěto pśeddanki na financny amt.

Moj facit: Cesnoamtski možo se angažěrowaś we wokognuśu w Nimskej jano ten, kenž por slabernych wušej ma. Głownoamtski w sejmach sedaś pak se wupłaśujo, tak dłujko, ako eksperty zjawnosći gronje, až z pjenjezami wot firmow za wotposłańce wšo po kaznjach běžy (do swojich kapsow). Teke togodla njedocakajom, rowno tak ako Angela Merkel, žedne mjenanje mjazy ekspertami stronow, ale teke žedne wjelike změny w praksy podlańskeje zasłužby. A to mě mucy.

Chceće swoje měnjenje k tutemu přinoškej wozjewić?
Wobdźělće so na našej diskusiji!