wućišćeć | pósłać

Domowina - Zwjazk łužiskich Serbow, Budyšin – 27.08.2005

Informacija Domowiny na 4. dnju zachowanja šulskeje syće

Staw skóržby staršich přećiwo zawrjenju SSŠ "Jurij Chěžka" Chrósćicy

Z časa Chrósčanskeho zběžka před štyrjomi lětami skorža potrjecheni starši přećiwo zawrjenju Serbskeje srjedźneje šule „Jurij Chěžka” Chrósćicy. Prawiznik Torsten Schmidt staršich juristisce zastupuje.

Wotpohlad skóržby běše:

1. docpěć přez zarjadniske kaž tež wustawowe sudnistwo spěšny rozsud přećiwo zawrjenju šule

2. je-li trjeba, skoržić hač do najwyšeju sudniskeje instancow – Sakskeho a Zwjazkoweho wustawoweho sudnistwa ze zaměrom, pruwować w artiklu 6 Sakskeje wustawy zapisane prawa Serbow na swoju wuskoržujomnosć.

Kajki je aktualny staw?

Wustawowej sudnistwje stej chwatny puć wotpokazałoj. Žadatej sej dodźerženje korektneho formalneho postupowanja přez zarjadniske a wyše zarjadniske sudnistwo, prjedy hač přiwozmu a wobjednaja skóržbu na wustawowym sudnistwje.

Tuž zapodachu starši swoju skóržbu na zarjadniske sudnistwo w Drježdźanach, kotrež je dnja 23. awgusta 2004 skóržbu wotpokazało.

Na zakładźe tutoho wusuda je so dalša skóržba na Sakske wyše zarjadniske sudnistwo zapodała. Sudnistwo njeje wo skóržbje dotal jednało, njeje wo njej rozsudźiło. Znate tež njeje, w kotrej dobje budźe rozsud předležeć.

Wola staršich je, skóržbu hač k wustawowemu sudnistwu dale wjesć, zo by so artikl 6 sakskeje wustawy na zakładźe precedencneho pada pruwował.

Domowina staršich podpěruje, zo njebychu pjenježne wudawki staršich poćežowali. Je namołwjała do pjenježneje zběrki a Serbja su pilnje składowali.

Dotalne wudawki wučinja 26.000,00 €. Domowina je tež dale zwólniwa skóržbu staršich moralisce a materielnje podpěrować, a to hač do kónčneje instancy – hač do wustawoweho sudnistwa.

Čěscy přećeljo su wot spočatka a stajnje zaso pjenježnu podpěru za puć skorženja poskićili. Hač do nětka nazběrachu wjac hač 7.000,00 €. Za to so jim ze serbskeje strony wosebje wutrobny dźak.

Wot njedawna organizuja tež asociěrowani čłonojo Domowiny w Texasu a w Awstralskej pjenježnu podpěruju. Tajke gesty mjezynarodneje solidarity su zdobom jasny wuraz toho, kotry wuznam prócowanja wo serbske šulstwo we wobłuku prócowanja wo přichod serbskeho naroda maja.

Chceće swoje měnjenje k tutemu přinoškej wozjewić?
Wobdźělće so na našej diskusiji!